Szpacyrkym po Cieszynie
“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Zmazane papióry
Kiejsi było jakosi wszecko inaksze, bo każdy wiedzioł kaj mo wyciepać rozmajte charapuci i zmazane papióry, coby nie narobić se ostudy. Dzisio też niby każdy to wiy, bo za to płaci, ale fórt ludzie majóm s tym moc łostudy. Rozchodzi sie ło to, że jak gdo dzisio cosi se kupi, to musi dycki ze sztwierć godziny zmitrynżyć na to, coby to rozpakować. Tego czasu jednakowóż mu sie zedrze wiyncyj, jak se kupi jakisi szrank abo odmaryje, kiero zapakowaano je w papyndeklowej kiśni. Je tego dycki tak moc, że jak sie to aji spruguje popuczyć, to je tego papióru wiyncyj niż tych mebli kiere sie kupiło. Wszedcy tustelocy przeca wiedzóm, że taki papyndekiel patrzi sie wyciepać do zwóna, na kierym stoji napisane PAPIER. Bjyda yno je s tym tako, że dziura w tym zwónie przez kieróm trzeja tyn papiór abo papyndekiel wciś je tako mało, że do ni wlezie yno pudliczko po sztrajchetlach. Gdo był tak móndry, że tak to wyszpekulyrowoł tego nie wiym, ale rod bych go widzioł jak wstyrko do tej dziury papyndeklowóm kiśnie s kupiónego szranku, abo s odmaryje. Tam kansi daleko we świecie ludzie wyciepujóm papióry i papyndekle do kóntenerów, kiere majóm na wyrchu wielki dekiel na bantach i skyrs tego poradzóm do nich weprać wszecki papiórziska. U nas dycki musi być inakszyj, coby ludzie mieli fórt s czymsi ostudem i musieli przed każdóm robotóm porozmyślać. To możne je aji dobre dlo naszych muzgowic, coby sie nie zastoły i roz za kiedy porozmyślały jako cosi wielkigo do małej dziury wstyrczyć, a przi tym nic se nie łodrzić i mieć uśmychniónóm gymbem.
Mini słownik gwary cieszyńskiej:
kiejsi - kiedyś, inaksze - inne, wyciepać - wyrzucić, charapuci - rupiecie, zmazane - brudne, ostuda - kłopot, fórt - ciągle, dycki - zawsze, zmitrynżyć - zmarnować, szrank - komoda, odmaryja - szafa, papyndeklowa kiśnia - tekturowe pudło, popuczyć - zmiąć, zwón - dzwon, wlezie - wejdzie, sztrajchetle - zapałki, wyszpekulyrowoł - wymyślił, wstyrko - wkłada, dekiel na bantach - pokrywa na zawiasach, skyrs - z powodu, roz za kiedy - czasami, wstyrczyć - wepchnąć, łodrzić - obetrzeć, gymba - twarz.
Tóż mjyjcie sie wszedcy dobrze i wiesiołego popióntku
Dodaj komentarz