Wytargać kostkem

Nie podarziło sie mi potkać ani jednego tusteloka, kiery pochwolił by tyn napad rychtowanio cieszyńskigo rynku, a moc ś nich rzóndzi, że je moc inszych wiecy w Cieszynie, kiere patrziłoby sie sprawić. Dycki to je tak, że jak ludzie sie zwiedzóm wiela co kosztuje i ty pinióndze przistawióm do swojigo płatu, to dziepro wtynczos chytajóm sie za czepónie. Bo przeca żeby wytargać kostkem granitowóm s cesty i nieskorzij jóm wrazić w to samo miejsce, ni może przeca kosztować telkowne pinióndze. Jako gdo to dycki ty pinióndze za takóm robotem rachuje tego nie wiym, ale na zicher jak uż to idzie ło milijóny, to każdy rozmyślo, że dobrze by było przibrać sie też do tej spółki. Co inszego je stawiać cosi ganc nowego, dejmy na to taki przistanek przi uniwersytecie, bo na niego wszecko trzeja nowe, a taki wieca moc kosztujóm. Inszo wiec je tako, że to je moc zaimawe, kiery tam na nim bydzie wsiadoł i nieskorzij s tego cugu wysiadoł. Przeca ta nowo sztreka nie kludzi ku Biylsku i skyrs tego żodyn tam stela nie bydzie po prowdzie ś nim jeździł. To samo zrobióm insi, kierzi miyszkajóm w Cieszynie, abo ci co przijadóm na banhof busami i poradzóm przeca pieszki przynś tyn kónsek cesty do uniwersytetu.Tak czy inakszyj bydymy sie nieskorzij dziwać, wiela bydzie tych ludzi na tym przistanku czakać na tyn cug, a wiela tak naprowde do niego wsiednie. S tym czakanim też bydzie kapke ostudy, bo żodnymu nie prziszło do czepóni, coby na tym przistanku postawić jakómsi małóm strzechem, kiero chróniła by ludzi jak s nieba, nie dej boże cosi luchnie.

Mini słownik gwary cieszyńskiej:

nie podarziło sie - nie udało się, napad - pomysł, rychtowanio - naprawiania, rzóndzi - mówi, wieca - rzeczy, patrziłoby sie sprawić - należałoby naprawić, płat - wynagrodzenie, dycki - zawsze, dziepro - dopiero, czepóń - głowa, cesta - droga, nieskorzij - później, wrazić - włożyć, telkowne - wielkie, na zicher - na pewno, stawiać - budować, moc zaimawe - bardzo interesujące, cug - pociąg, sztreka - tory, nie kludzi - nie prowadzi, skyrs - z powodu, tam stela - tam stąd, banhof - dworzec, nieskorzij dziwać - później patrzeć, kapke ostudy - trochę kłopotu, cosi luchnie - coś poleje

Tóż miyjcie sie wszedcy dobrze i wiesiołego popióntku